လုၵ်ႈႁဵၼ်းတႆး ႁပ်ႉၸုမ်ႈၶူး တီႈၸၼ်ႉၸွမ်ရင်းသိတ်ႇ မိူင်းၵွၵ်ႇ ၸိုင်ႈထႆး

ၵၢၼ်ႁဵၼ်းၼႆႉၵေႃႈ ၼင်ႇႁိုဝ်ပေႃးတေမီးတိုဝ်ႉတၢင်းလႆႈႁဵၼ်း ၵေႃႈလႆႈၶတ်းၸႂ်ႁႃ။ ပေႃးလႆႈႁဵၼ်းယဝ်ႉၵေႃႈ တေလႆႈ ၶတ်းၸႂ်ၼင်ႇႁိုဝ်ပေႃး တေႁွတ်ႈထိုင်လႆႈ တီႈယိူင်းမႆၢၼၼ်ႉ တေလႆႈဝႃႈပဵၼ်သဵၼ်ႈတၢင်း ဢၼ်ယၢဝ်း ၵႆဝႆႉယူႇ။ ၵူၺ်းၵႃႈဢမ်ႇဝႃႈတေယၢဝ်းၵႆ၊ ႁိူဝ်ႉ၊ တုၵ်ႉယၢၵ်ႈ ထၢၼ်ႇႁိုဝ်ၵေႃႈလီ တွၼ်ႈတႃႇၶဝ်သွင်ၵေႃႉ ၼႆႉတႄႉ တေလႆႈဝႃႈ ႁဵတ်းယဝ်ႉတဵမ်ထူၼ်ႈသေ  ယိူင်းမႆၢၵၢၼ်ႁဵၼ်း တွၼ်ႈတႃႇၼႂ်းၸၢတ်ႈပၢၼ်ၶဝ်ပူၼ်ႉၵႂႃႇ ယဝ်ႉၶၵ်ႉတွၼ်ႈၼိုင်ႈ မိူဝ်ႈလႆႈႁဵၼ်းယဝ်ႉ ၸၼ်ႉၶူး(Bachelor Degree)။

ၼႂ်းဝၼ်းထိ 1 - 3. February. 2014 တီႈၸၼ်ႉၸွမ်ရင်းသိတ်ႇ (Rangsit University) မိူင်းၵွၵ်ႇ လႆႈမီးပၢင်ႁပ်ႉ ၸုမ်ႈၶူးတွၼ်ႈ တႃႇ လုၵ်ႈႁဵၼ်းၸၼ်ႉ Bachelor လႄႈ Master ဢၼ်ယဝ်ႉၵၢၼ်ႁဵၼ်းၼႂ်းပီ 2013 ယူႇ။ ၼႂ်းၼၼ်ႉ ၵေႃႈပႃးဝႆႉလုၵ်ႈႁဵၼ်းတႆးႁဝ်း ဢၼ်ႁဵၼ်း ယဝ်ႉ ၸၼ်ႉ Bachelor ယူႇသွင်ၵေႃႉ။ 

ၸႆၢးၽူးမိူင်း ပဵၼ်ၵူၼ်းၸႃႇတိ ဝဵင်းၵဵင်းတုင် မိူင်းတႆးပွတ်းဢွၵ်ႇ။ လႆႈမႃးႁဵၼ်းတီႈၸၼ်ႉၸွမ်ရင်းသိတ်ႇ မိူဝ်ႈပီ 2010 ။ လႆႈႁဵၼ်းပႆၢး Bachelor of  International Relationship and Development။ ႁဵၼ်းယဝ်ႉမိူဝ်ႈႁၢင်ပီ 2013  သေ ၼႂ်းပီ 2014 ၼႆႉၵေႃႈ မၼ်းၸႆၢး ၵေႃႉၼိုင်ႈ ဢၼ်တေလႆႈႁပ်ႉၸုမ်ႈၶူးယဝ်ႉ။ ႁဵၼ်းယဝ်ႉမိူဝ်ႈႁၢင်ပီ 2013  သေ ၼႂ်းပီ 2014 ၼႆႉၵေႃႈ မၼ်းၸႆၢး ၵေႃႉၼိုင်ႈ ဢၼ်တေလႆႈႁပ်ႉၸုမ်ႈၶူးယဝ်ႉ။ ၵူၺ်းၵႃႈ ၼႂ်း ဢၼ်ၵၢမ်ႇလီၼၼ်ႉၵေႃႈ ပႃးၵၢမ်ႇဢမ်ႇလီမႃးယူႇ ယွၼ်ႉလူၺ်ႈၼႃႈၵၢၼ်သေ မၼ်းၸႆၢးဢမ်ႇလႆႈမႃး ၶဝ်ႈႁူမ်ႈၸွမ်း ပၢင်ပွႆးၼႆႉ။

ၼၢင်းၸၼ်ၼွႆႉ ပဵၼ်ၵူၼ်းၸႃႇတိ တူၼ်ႈတီး သေ ၶိုၼ်ႈႁူင်းႁဵၼ်း ၸၼ်ႉသုင် မႆၢ 2 တီႈဝဵင်းတူၼ်ႈတီး။ ဝႆၢးသေႁဵၼ်းယဝ်ႉၸၼ်ႉသိပ်းယဝ်ႉ ၼႂ်းပီ 2007 လႆႈမီးတိုဝ်ႉတၢင်းမႃးႁဵၼ်း ၽႃႇသႃႇဢိင်းၵလဵတ်ႈ တီႈႁူင်းႁဵၼ်းၵူၼ်းၼုမ်ႇ ၸိူဝ်ႉၸၢတ်ႈၸိုင်ႈတႆး (SSSNY)။ ပီ 2008 ဝႆၢးသေယဝ်ႉႁူင်းႁဵၼ်း (SSSNY)  ယဝ်ႉ လႆႈသိုပ်ႇႁဵတ်းၵၢၼ်ၶၢဝ်ႇၸွမ်းၸုမ်းတႆးတီႈၵဵင်းမႆႇယူႇ။ သိုပ်ႇၼၼ်ႉၵေႃႈ ၶိုၼ်းလႆႈသိုပ်ႇၶိုၼ်ႈႁဵၼ်းထႅင်ႈတီႈႁူင်းႁဵၼ်း Intensive College Foundation Course (ICFC) တွၼ်ႈတႃႇလႆႈဝႂ် GED  တႃႇသိုပ်ႇႁဵၼ်းၸၼ်ႉၸွမ်။ ဝႆၢးသေတွပ်ႇလႆႈ GED ယဝ်ႉ  ၼႂ်းပီ 2010  လႆႈမီးတိုဝ်ႉတၢင်းမႃးႁဵၼ်းတီႈ ၸၼ်ႉၸွမ် ရင်းသိတ်ႇ လႄႈ လႆႈႁဵၼ်းပႆၢး Bachelor of Philosophy, Politic and Economic။  ဝႆၢးသေယဝ်ႉႁဵၼ်းၼႂ်းႁၢင်ပီ 2013 ယဝ်ႉ ၼႂ်း ပၢင်ပွႆးႁပ်ႉၸုမ်ႈၶူးပွၵ်ႈၼႆႉၵေႃႈ မၼ်းၼၢင်းၵေႃႉၼိုင်ႈပႃးဝႆႉယူႇ။

ၼႂ်းႁူဝ်ပီ 2014 ၼႆႉၵေႃႈ တေလႆႈဝႃႈပဵၼ်ပီဢၼ်လီတွၼ်ႈတႃႇၶဝ်သွင်ၵေႃႉ ဢၼ်လႆႈႁပ်ႉၸုမ်ႈၶူးၸွမ်း ၼင်ႇတၢင်းယိူင်းဢၢၼ်းလႄႈဝူၼ်ႉဝႃႈတေၵိုင်ႇတၢၼ်ႇတွၼ်ႈတႃႇၶဝ်သွင်ၵေႃႉ ဢၼ်လႆႈႁိူဝ်ႉလႄႈၶတ်းၸႂ်မႃး ၶၢဝ်းတၢင်းႁိုင်ၼၼ်ႉယူႇ။